এ আঈ সি সি গী লুচিংবা রাহুল গান্ধিনা হৌখিবা ইং কুমজা ২০২২ গী সেপ্তেম্বর থাদগী কৈন্য়াকুমারিদগী খোংশানবা হৌখিবা ভারত জোরো মিসন অসিদা লৈবাক অসিগী মীয়াম্না কংগ্রেসপু শৌগৎলকপা হেনগৎলক্লি। মীয়ামগী ইহৌ অসিনা লাক্লিবা কুমজা ২০২৪ দগী কংগ্রেসকী মতম লাক্লগনি হায়না মনিপুরগী ইনচার্জসু ওইরিবা এ আঈ সি সি গী ওবজার্বর পুনদুচেরিগী হান্নগী চিফ মিনিষ্টর নরায়ন স্মামিনা হায়খ্রে। ঙসি ইম্ফালগী কংগ্রেস ভাৱনদা পাওমিশিংগা উন্নবদা মহাক্না ৱাফম অসি ফোংদোক্লদুনা কংগ্রেস লৈঙাক্কী মতমদা লৈবাক অসিগী জি দি পি গী চাং চাদ ৯ ওইরম্বা অদু হৌজিক বি জে পি গী লৈঙাক অসিগী মতমদদি চাদা ৫ দা হন্থরক্লে।
বি জে পি গী লৈঙাক অসিনা মীয়ামগী মরুওইবা ইসুশিং খংদ্রে। নোংমগী তঙাইফদনা চংদ্রবা য়াদ্রবা পেত্রোল, দিজল, গ্য়াসনচিংবগী মমল লেপ্তনা হেনগৎলক্লি। পব্লিক সেক্তর অয়াম্বা প্রাইভেৎ সেক্তরদা ওন্থোকখিদুনা মীয়ামদা অৱাবা হেন্না পিরি। সেনত্রেল অজেন্সিশিং সি বি আই, এনফোর্সমেন্ট দাইরেক্তোরেৎনচিংবশিং অসি বি জে পি গী লৈঙাক অসিনা লান্না শিজিনরি হায়না ফোংদোকখি। লোয়ন্না ঙসি পার্টি অসিগী শকনাইরবা লুচিংবা কয়ানা শরুক য়াদুনা হাট সে হাট জোরো অভিয়ানগীদমক মাংজৌন্না খন্না নৈন্নবগী মিফম অমসু কংগ্রেস ভাৱনদা পাংথোকখি।