প্রাইম মিনিষ্টর নরেন্দ্র মোদিগী চিয়ারমেন্সিপ মখাদা ইন্দিয়াগী ষ্টেট খুদিংদা পাংথোক্কদবা জি- 20 সম্মিৎ কীদমক মনিপুরগী ওইনসু শেম শাবা লোয়রে। মালেমগী অপুনবগী শেল থুম চাদা 75 রোম পায়রবা শক্তি লৈরবা লৈবাকশিংগী মিহুৎশিং লাক্কদৌরি, শক্তি লৈরবা লৈবাকশিংগী মিহুৎশিং তরাম্না ওকতুনা লমদমসি মাংলোমদা চংশিন্নবা হোৎনসি মখল অমত্তগী অয়েৎ অপন থোকহনগুমশি হায়না ঙসি পাওমিশিংগা থম্বাল শংলেন্দা উন্নবদা চিফ মিনিষ্টর এন বিরেন সিংহনা ফোংদোকখ্রে। জি- 20 সম্মিৎ অসি মনিপুরদা নুমিৎ নিনি পাংথোক্নবা শেম শারি। ব্যুজিনেস সম্মিৎ অমা সিতি কনভেন্সন সেন্টরদা পাংথোক্কনি। মার্জিংগী পোলো ষ্টেচু, গোবিন্দজি মন্দির, আই এন এ কমপ্লেক্স, সঙাই ইথনিক পার্ক, লোক্তাক পাৎ অমদি মনিপুর ওলেম্পিয়ান পার্কনচিংদা জি- 20 সম্মিৎ শরুক য়াবা লাক্লিবা দেলিগেটশিংনা য়েংবা চৎকনি। জি- 20 সম্মিৎ অসিগী মনুংদা ফেমিনা মিস ইন্দিয়া পাংথোক্নবসু শেম শাবা লোয়রে, পাংথোকদৌরিবশিং অসিগী মতাংদা মীয়াম্না মিনিষ্টরশিং উনবা ফংদ্রবসু বি জে পি ওফিস পুং 24 চুপ্না থোং হাংদুনা থম্লিবা অসিদা পাও ফাওনবিয়ু হায়না ফোংদোকখি।
চিফ মিনিষ্টরনা হায়, থা অসিগী ১৬,১৭ তা পাংথোকখিবা বি জে পি নেস্নেল ইগজিক্যুতিভ মীফম্না পার্টি প্রসিদেন্ট জে পি নাদ্দাগী মতম ২০২৪ গী জুন ফাওবা শাংদোকখ্রে। হৌজিক মনিপুরদা টুরিষ্ট লাকপগী মশিং হেনগৎলক্লি,টুরিজমগী খুত্থাংদা থবক পীবা ঙম্লক্লে। হায়র ইদুকেসন্দা মনিপুরিশিং য়াওবা ঙম্লক্ত্রিবসি মতম অমাদা বন্দ, ব্লোকেদ,মহৈ তমগদবা মহৈরোইশিংবু হোইদুনা পুরগা লম্বি শরক্তা ইহৌ হৌহনদুনা থমখিবগী মহৈনি। মীয়ামগী মতেংদগী ঙসিদি বি জে পি গী লৈঙাক লৈবদগী থৌদোকশিং অসি থোকহন্দনা ইংনা তপ্না লৈরি।হৌজিক তুরেনশিংগী ইচেল তৎলকতুনা মীয়ামদা তোতি ইশিং পিবা ঙমদবগী ফিভম অমা লাক্লিবসি কোকহন্নবা লৈঙাক্না থৌরাংশিং পায়খৎলি। পোপি থাবগী উমং কোকথোকপা অসিনা ঐখোয় পুন্না অৱাবা তামিন্নগনি। পোপি থারম্বা মীওইশিং অমত্তা লেম্না থারোই । সাইকুল , কৌব্রু, থাংজিং, শজিক তম্পাক, কামজোং গী মফম খরাদা দ্রোন শিজিনদুনা সাইন্টিষ্টশিংনা অয়াবা পিরবা হিদাক শিজিনদুনা মাং তাকহল্লি। পোপি থারমবা মফনশিং অসি নোং চুবগা দ্রোন 60 শিজিনদুনা উপালশিংগী মরু থাবা হৌরগনি । হৌজিক হৌজিক দ্রোন ৩ শিজিনরি। চিফ মিনিষ্টর এন বিরেন সিংহনা মখা তারদুনা অৱাং নোংপোক ষ্তাটেটশিংদা থৌদোক অমা থোকপগা এক্ট অমা থনজিনবা, অর্মি থাজিশম্বা অদু প্রাইম মিনিষ্টর শ্রী নরেন্দ্র মোদিজিগী লৈঙাক লাক্লবা মতুং অসিদগী ইং তপ্পা শান্তি লৈবা লমদম- চাওখৎ মাইকৈদা চংশিল্লক্লি।¡ú